...
He xiica quiistox hizaax oo cöhapacta ha
Cmaax haapi ptiti ptee hapooilajc hapaticpan yeen iquii hapoqueelac taax, cmaax mos ziix iscaaticpan ihmaa quiih taax yeen iicp hac iicp poohca taax hasiiht haa ha. Hant quij tcooo iij tpacta ma Comcaac coi hantx cmiiha hac ii mis iha xo, haapi ziix quih hocoaaj quih haapi hisolca coi áno caahca quih taax hisolca cöhimacoaaxoj iha, he comcaac haapi hisoj ihaaizi taax hisolca coi iiqui oo cooih iha.
Hant ihánl capxa pac iquii coiih taax iti cofíin iha,xiica quiistox hapx iicp hac iicp mocat coi ziix ocoaaj quih taax hisoolca coii an itamxoj xox haapi hisolca hizcoii,haapi ziix quih hocoaaj taax coii yéen oo iquitiin ma x hant zo cöcaamoi. Taax xah oo cötpacta ma hant quih ziix án hant hipah iic cöihiipe ziix quih áno miizj ipaii iic cöihiipe hiizac coisqueelajc ha taax he caqueelcam iha xiica quiistox hapx iicp hac iicp mocat comcaac coi ziix hocoaaj quih hapx iquii queelac quih chaa coi, cmaax hizac iti cöiihca hac.
...
...
Ziix quih yeen icmooca hayaqueelcam

Xiica quiistox hino tazcam x comcaac coi ziix quih hocoaaj quih hapx iquii imqueelac tax, xiica taax z iti cpoo paii taax cmisqueelajc ha taax oo cöhaapácta ha. Ziix quih hantx moca quih hocoaaj xah hanso ziix quih hiipacta quih hocoaaj quih chaa taax, cmiique quih ihmaa quij mos cöhisiiya haa coo mos oo cöhaapacta ha. He xiica quiistox Comcaac haapah ziix quih hantx moca quih hocoaaj xah, haapi ziix quih hisolca coii áno caahca taax he comcaac quih chaa haa pocooo x ziix quih hant hiizamlcam taax cöquii hisiyaj hac oo cöhaapacta ha.

...
...
Ziix quih ihacóhot toox moca timooca

Hant ziix quih áno miizj hicapaii quiiya hizac,haapi ziix quih hisoj ihaaizi xah hayaaza xah taax áno pah chaa x ziix zo cöihasiijim iic cöisiipe chaa ha, ox popacta ta x mos, xiica quiistox hapx iicp hac iicp coii coi ziix quih hant ihiip quih quiiyaj coii ziix quih cötaticpan x itanloj yeen hiquii tqueelac x hant zo cmoii, taax oo cöhapoii x yeen iquii hapitooij toc conthásat haa ha. Ox popacta taax cmaax ziix quih oo coaatai x ziix quiisax ihmaa quih haquiix tiix toox tiij xox coii ihax oo hicooza hamiiyaj taax tiix cmis quih oo cöhapoii x ,xiica quiistox com pocooo tax ziix quih hocoaaj tanticat cöihacoht hapoaaj x mos quínihamxoj hasiyaj aha, hapii poo caazoj x mos ziix quih án hicapaa quiiya ha.

...
Ziix hayaqueelcam

1.- Xiica quiistox quih hapx iicp hac iic mocat quih comcaac coi ziix ocoaaj quih hapx iiqui oqueelajc coi cömisqueelajc hac oo cöipáh iha.

2.- Ziix hapaspoj z imhaa,ziix quih an hant ipáh iic cöquiipe pac toc cöpoohca ta,comcaac coi ziix quih ipacta quih ocoaaj coi hant paii ta,xiica quiistox com pocooo cöisiiht hac oo cöspah poho x comcaac coi hapi pihiiha ta oo cöspah poo ho x.

3.- Xiica quiistox quih iij iiqui coiitim ziix icatícpan ihmaa quih ccanloj coi ziix quih oaanloj coi pocooo ta mos xiica quiistox ihmaa coi cöisiiht hac oo cöisíi aha.

4.- Ziix quih iti mota iitax quih po haa ta x hacoo mos ziix quih miizj hant pahaafin ta yeen iiqui piin taax ziix qui hant cöhaapais quih taax po haa ta x mos toc siihca cah ha.

5.- Hant hizac ziix quih iti mota iitax quih quih poha iti poohca toc poohca ta x cmaax xiica quiistoj hapx iicp hac iicp coii coi hicoot ihaai químzo zo haquiix piih x hiicot ihaai hisíiya haa ha.

6.- Cmaax ziix quih hizac iti caahca quih chaa hac cmaax haapi ziix quih pocooo ta x hant cöihiip quih hapoaaj he comcaac haapi ziix quih miizj hant cöisiicmolca hac oo cöhaapacta ha.